eConsult

Mae eConsult yn galluogi practisau meddygon teulu yn y GIG i gynnig ymgynghoriadau ar-lein i'w cleifion.  Mae hyn yn caniatáu i gleifion gyflwyno eu symptomau neu geisiadau i'w meddyg teulu eu hunain yn electronig ac mae'n cynnig gwybodaeth hunangymorth y GIG 24 awr y dydd, gan gyfeirio at wasanaethau a gwiriwr symptomau. eConsult yw'r offeryn brysbennu digidol ac ar-lein a ddefnyddir amlaf ym maes gofal sylfaenol y GIG, a adeiladwyd gan feddygon teulu'r GIG ar gyfer cleifion y GIG, a gynlluniwyd i wella mynediad cleifion, gwella effeithlonrwydd practisau a chyfeirio cleifion i'r lle iawn ar yr adeg iawn am eu gofal.  Mae'r defnydd wedi bod yn gyflym gyda dros 3,200 o bractisau ledled y DU bellach yn defnyddio eConsult mewn rhyw ffordd. Yn anecdotaidd, mae defnydd, nifer y defnyddwyr ac ymrwymiad i eConsult yn amrywio o bractis i bractis. O fewn ardal Bwrdd Iechyd Prifysgol Caerdydd a’r Fro mae rhai practisau nad ydynt yn defnyddio eConsult ac mae rhai wedi newid eu model darparu i ganolbwyntio ar eConsult.  

Nodau’r Prosiect

Nod y prosiect yw cynnal darganfyddiad ar y defnydd, arfer da, ffactorau llwyddiant, rhwystrau a heriau i fabwysiadu a defnyddio eConsult o fewn gofal sylfaenol. Bydd TEC Cymru yn gweithio gyda phractisau meddygon teulu ar draws Bwrdd Iechyd Prifysgol Caerdydd a’r Fro i ddechrau, gan gyfweld â meddygon teulu a thimau practis i ddeall eu profiadau wrth fabwysiadu eConsult. Y bwriad yw y bydd yr allbwn yn adroddiad darganfod a fydd yn coladu'r adborth i nodi arfer da, ffactorau llwyddiant, rhwystrau a heriau a ddefnyddir gan Fwrdd Iechyd Prifysgol Caerdydd a’r Fro a sefydliadau eraill i ddarparu gwell cymorth ar gyfer gweithredu eConsult.  

Yr ateb

Bydd Bwrdd Iechyd Prifysgol Caerdydd a'r Fro yn gweithio gyda chlystyrau ac arweinwyr gofal sylfaenol yn eu hardal i nodi'r cyfranogwyr priodol ar gyfer yr adolygiad darganfod.  Y bwriad yw y byddwn hefyd yn nodi Bwrdd Iechyd arall i gymryd rhan yn yr adolygiad hwn, mewn ardal fwy gwledig os oes modd.  Bydd hyn yn galluogi'r adolygiad darganfod i gymharu profiadau ar draws poblogaeth ehangach, daearyddiaeth a demograffeg, gan wella'r ddealltwriaeth a'r gwerthusiad.   

Bydd TEC Cymru yn cynnal yr adolygiad darganfod – astudiaeth Cam 0 yn ôl ein Fframwaith Ymchwil a Gwerthuso.  Bydd TEC Cymru yn defnyddio methodoleg gymysg er mwyn:   

• Cynnal Adolygiad Llenyddiaeth   
• Cynnal cyfweliadau ac arolygon gyda chyfranogwyr a nodwyd   
• Bydd cyfweliadau a grwpiau ffocws yn cael eu hwyluso a'u dadansoddi gan dîm TEC Cymru  
• Coladu'r canfyddiadau a datblygu argymhellion mewn adroddiad darganfod i'w gytuno rhwng y partneriaid cyn ei ledaenu  

Ar hyn o bryd, mae'r prosiect hwn yn y camau cychwynnol ac mae briff y prosiect yn cael ei gwblhau.