Un Diwrnod, Dau Ddigwyddiad

Cyflwynodd tîm API DHEW weithdy technegol dwys i’w API nesaf, Cofnod Gofal Cymru. Roedd 40 yn bresennol yn y gweithdy - yn ddatblygwyr ac arbenigwyr gwybodeg o'r diwydiant a'r GIG. Aethom drwy'r API, gan ddangos y bensaernïaeth a'r isadeiledd y tu ôl i'r porth API newydd sbon. Roedd cyfle hefyd i'r gynulleidfa glywed am y safonau diweddaraf a ddefnyddir gan y tîm API sy'n lleihau baich dogfennaeth yn ogystal â chaniatáu rhyngweithredu a gallu i addasu. Dangosodd Dafydd Loughran o Concentric Health sut roedd API Cofnod Gofal Cymru yn gwella ymarferoldeb eu platfform cydsynio. Daeth y digwyddiad i ben gyda thîm o BJSS yn sôn wrth y gynulleidfa am eu datblygiad API diweddar gyda'r Fframwaith Dyfodol TG Meddygon Teulu ac App y GIG, gan drafod rhai gwersi allweddol a ddysgwyd wrth ddatblygu API mewn ffordd ystwyth gan weithio gyda'r sector cyhoeddus. Bydd rhagor o wybodaeth am ein porthol API a datblygiadau yn y dyfodol ar gael yma: https://digitalhealth.wales/cy/porthol-datblygu

Gan weithio'n gyflym, trodd y tîm eu sylw at ddigwyddiad nesaf y diwrnod a oedd yn rhoi sylw i Raglen Trawsnewid Digidol Llywodraeth Cymru. Arweiniwyd y prynhawn gan Ifan Evans, Cyfarwyddwr Technoleg, Digidol a Thrawsnewid Llywodraeth Cymru ar gyfer Iechyd a Gofal ac roedd bron i 100 o bobl yn bresennol. Cyflwynodd Ifan y Rhaglen a gyhoeddwyd yn ddiweddar i’r gynulleidfa, gan gynnwys y sylw i lwyfannau a phensaernïaeth agored, yr adolygiad diweddar o bensaernïaeth ddigidol, datblygu Gwasanaeth Gwybodeg GIG Cymru yn Awdurdod Iechyd Arbennig a'r bwriad i ddatblygu safonau y cytunwyd arnynt yn gyffredin.

­

Aeth Ifan yn ei flaen i egluro ffocws yr Adolygiad Pensaernïaeth Ddigidol, sef asesu i ba raddau mae Pensaernïaeth Ddigidol gyfredol GIG Cymru yn barod i gyflawni'r uchelgais a nodir yn ‘Cymru Iachach’, ac a yw'n raddadwy i ategu trawsnewid digidol ar draws iechyd a gofal cymdeithasol Cymru. Roedd yr adolygiad yn cynnwys adolygiadau technegol gyda NWIS a gweithdai a chyfweliadau â thros 100 o randdeiliaid allweddol o NWIS, pob Bwrdd Iechyd, a’r prifysgolion, ynghyd â thair “sesiwn ddwys” ym Myrddau Iechyd Aneurin Bevan a Chwm Taf, ac Ymddiriedolaeth Iechyd Cyhoeddus Cymru. 

Daethpwyd i dri chasgliad mawr o ganlyniad i'r adolygiad:

• Y sefyllfa bresennol - mae angen ymagwedd system gyfan fwy safonol a chyfunol ar draws iechyd a gofal cymdeithasol Cymru
• Cyfle - yn ystod y ddwy flynedd ddiwethaf, cydnabuwyd nad yw ymagweddau traddodiadol at ymdrin â thechnoleg ddigidol ym maes iechyd a gofal cymdeithasol yn addas at y diben erbyn hyn. Mae’r weledigaeth dechnoleg yn ‘Cymru Iachach’ yn cyd-fynd â’r ffordd o feddwl gyffredinol hon ac yn gyraeddadwy
• Ymagwedd - mae angen ymagwedd ddeuol fel bod cydnerthedd ac arloesi yn mynd law yn llaw

Uchelgais ddigidol GIG Cymru yw canolbwyntio ar gleifion a gwasanaethau, a bod yn ystwyth, er mwyn galluogi arloesi a chydnerthedd, dibynadwyedd a pherfformiad cenedlaethol o’r radd flaenaf. Bydd y bensaernïaeth darged ar gyfer GIG Cymru yn cynnwys sawl cydran, gan gynnwys:

• Sianeli digidol - rhyngweithio â chwsmeriaid, dinasyddion a chleifion drwy'r cyfryngau digidol
• Systemau digidol - cydrannau sy'n ategu cymwysiadau digidol/rhyngweithio digidol rhwng cwsmeriaid a'r gwasanaethau
• Llwyfannau a seilwaith - rhwydwaith craidd a seilwaith storio i ategu'r gwaith o alluogi cydrannau'r platfform yn ddigidol
• Diogelwch a hunaniaeth - cydrannau sy'n ategu’r gallu i adnabod defnyddwyr, amddiffyn eu gwybodaeth a sicrhau mynediad priodol

Roedd cymysgedd ardderchog o gynrychiolwyr y GIG, y diwydiant a'r byd academaidd yn yr ystafell a hwylusodd drafodaethau gafaelgar a oedd yn procio'r meddwl drwy gydol y sesiwn. O ganlyniad i ddigwyddiad y prynhawn, roedd modd i bawb a oedd yn bresennol gael gwell dealltwriaeth o'r adolygiadau sydd wedi digwydd, y cynlluniau a roddwyd ar waith ac uchelgais Llywodraeth Cymru a GIG Cymru ar gyfer gwasanaeth iechyd a gofal cymdeithasol yn y dyfodol lle bydd y dirwedd ddigidol gymhleth bresennol yn esblygu'n un ystwyth.